Luke 12

Yesu wa Daɓo Nna Zayezhi Yi

1Esa fyewyi aza yezhi n mwa sosai har ɓai kun aje ya laɓa. Amma Yesu wa gna owo abara ge, “Fye zhin peceiye n a Farisiyi yi, gama ɓa zhin ɓa wu aza ge ɓa zhin aza manayi nu, amma zaho to du ɓa n aɓonukwoyi zhin m. Aɓe ye vinya ɓei kun bmi nwyihoi. 2Kwo ɓo wu ngye yist n na zhin a fi n bredi nyi. 3Gama ɓeho-ɓehoi n ɓa da n bwi-bwi kwo ɓei la kunzhi, nya nɓada n wyegma kwa aɓei wo kwo n buzangna.

4“Emi anugundo, Fye to wo aza dna n ɓaye ɓa wu fye nyi m. Ɓa mi ɓa wu fye nayi nu kawai. Ɓa to n ikoyi lo n fye wye-wyeyi m. 5Amma miɓa gna fye, oza n fya wo wo dna. Owo nu zhin Shekwoyi. Gama wo n ikoi lo wa wu za, wa je oza dna n anapi njesun.

6“Azhin a kun gbakolo akniya? Ai oɓa gyiwye to mwa m. Amma Shekwoyi ta zo ɓa mwi m. 7Shekwoyi kpelo shi oho tukwoyi lo nsun. Ai fye du agbakolo lo n mwa-mwa n Shekwoyi aba.

8“Njesun ma gnafye gaiciya, omi, Kristi mi ɓa gafye mwa-mwa n Shekwoyi amalaika aba ndai fya gwo mi ngye ofye nugundo. 9Amma aza nɓa na miɓo n aza ba, to, mi ɓei naɓa ɓo ce n Shekwoyi amalaika aba. 10Njesun zaho-zahoyi wa da mi (oza nugun) ɓenukwoyi aɓa zhin wo gafara. Amma oza wa da Zafun gyi-gyi-yi ɓe nukwoyi, ata zhin wo gafara m.

11“Njesun sanu na ɓe nfyei n a Farisiyi ye aba, ntuge ɓa da fye wa n aduwa nyakun, fye to damu n nyai n fye ɓa da m. 12Gama Zafun Gyi-gyi-yi ɓa gna fye nya fye ɓa da n ɓa ʼba.”

13Nsayi zaho wa ciwo ge, “Dagayi gna emi zado ya gna gado n gnisun.”

14Amma Yesu wa ciwo ge, “Zanyikoci nyika nu na dna mi alkali n nabai ma da owa ye pya? 15Zhin peceiye to zhin aɓo wye da m. Gama wye-wyeyi hin-hin nya to gni ge sai hoi n nyabwayi nu m.”

16Nsayi wa ga misali ye, “Gyi wye-da ho ɓei nfwai gni, kwa ga ampani dai-dai. 17Har ma a dobui ɓa kuwo nu, to wa bwa ʼba n wo ɓa ya adoho zhi m. Nsayi wa zhin nubo wa cige, 18‘Miɓa adobui ye ɓaya, ma mi awoi-woyi n nabai ma bwa aba ma fi ɓa. 19Nsayi ma ci mi wye-wyeyi ge, la sun lonu, gama ho n nyagyi lo har n ayei mwa. Ntuce nu dagma ha gyi hoi sin.’

20“Amma Shekwoyi wa ciwo ge, ‘Zagbelo! Ho ɓa fi n naiye. Anya ye nɓa zhinyi mwa, ho ɓa fa zhi nyika?’

21“I, zaho-zahoi wa zhin aziki n anyi ye, to wa zhin n she m, wola ze zagbolo.” 22Nsayi wa ci wa bara ge, “Fye to sa aɓo ntu nyagyi ɓom, kwo kwa aje n fye ɓa kpe m. 23Gama wye-wyeyi du nyagyi lo n ajeyi 24Fye shi a kwasa-kwasa wye, ɓa ta nufa m, ɓai gna ge ɓai na dobui m. Amma ɓa n nyagyi ntuge Shekwoyi nu ga ɓa. Amma fye du ɓa lo n mwa-mwa n Shekwoyi aba.

25“Amma kwo fyei sa aɓo kwo ɓa gafye ampani ho? Kwo ɓa mi kwa ɓe fya nyipyeyi? Awo. 26To mi gye ampani n fye ɓa sa aɓo ntu anya dagmai ɓo, shi ko nyi kwo ta bma zhin lo n anya ɓiɓi ɓo ma.?

27“Fye shi agbe-gbe awye, ɓa ta lu ajem, amma Solomon n wo mwa-mwa yi vinya, wo to ɓei kpe aje manayi n gye ɓa m. 28To, ndai Shekwoyi zhin wa kpe agbe-gbe ye aje n ɓa zhin ɓa fi n pye-pye nyi, fye ta gye ngye wo ɓa ga fye m, ko? 29Fye to sa aɓo njesun ntu nyagyi ɓo m. Nya nfye ɓa gyi n nyai nfye ba sin m, gama Shekwoyi ɓa ga fye. 30Aza vinya zhin ɓa mwa nyagyi mwz-mwa nu. Amma ofye dada n wo tu ʼShe nyi wo kpe nya ye lo n fye ye. 31Woɓa ga fye nyaho-nyahoyi n fye ye vinya cici, sai dai fya Dagayi ɓe mwi shi na bye.

32“Ntu cenu fye to wo dna m, aɓi gama ko zhin kwa da fye dada wa ga fye owo ʼbe mi. 33Fye kun anya vinya n fyei ce lo, fya ku ga aza nɓa to cei lo m, Deye ɓa gafye arziki n She mi. Gama nya ta wunya ɓom, ai ta wyi vi ɓo m, a gwowyi kwa ta gyi anya ɓo m. 34Gama abaho-baho n ho arziki shi oho bugba nyi ɓo nu ce.

35“Fye ku shiri zhin. 36Ntu Dagayi zhi-zhi ɓo n amula pa ba, nsayi fye ɓei zhi n shiri yi fyei gu wo aba ya sanu wo ɓei ɓe ncei. 37Aɓei da aza n mwa n ɓa zhi lo ɓai pmi wo ɓeɓe nyi. Dagayi n wohin wo ɓei gaɓa mwa-mwa owo nya. Wo se ɓa ase zhi, wo ga ɓa nyagyi.

38“Kpekni wa ɓe n wyeshei kokwa n saduyi. Amma saho-sahoyi n wa ɓe n cei aɓei da aza mwa nɓa ku shiri zhin nyi.

39“A ɓei gna ge aza kpe esa ye lo n wo ɓei jeze ɓe n cei nyi, ai ku shiri zhin, shi aza zhin ɓa zhin shiri, ɓai ku wo ge evi lo nyi. 40Ntucenu fye zhi n shiri yi n saho-sahoyi, gama emi, ‘Za nugun ɓa ɓe saho-sahoi.’ ”

41Bitrus wa nya wo ge, “Ho daɓo n yi nu kadai kwo kwa n zaho-zahoi.”

42– 43– 44 ▼

▼The text of verses 42-Luk 12:44 has been merged.

Yesu wa ciwo ge, “Mi daɓo n zaho-zahoi nu n wo nɓefyecei lo, n wo n nubo zhi lo. Eza n wo dagayi wa ga wo tnu-tnu n nabai wa bma aza do zhin. Nwo dagayi wa jeze ɓe wa gye wo ku tnu-tnu zo zhin n bmiya, a ɓei gawo lada. Owo dagayi ɓei tu wo n anya she vinya n wo ncei.

45“Amma n zayiʼa cige, ‘emi dagayi tajezeɓe n pye m.’ Wa ceba wa lu aza, na gnawo ge wo bma zhin nyi, n jesun woi wun esaya n ajesin ba woi sin je. 46To owo dagayi ɓei zhi to woi kpe m, woi shin wo ya n aba manayi woi lo n woi n naba kwo to bmiya ngye deyi m. 47Ai ɓei gawo tata gama wo ɓei kpe wo tnu-tnu ye ama wo to ɓei zhin kwo m.

48“Amma oza n wo takpe ge wo zhin laifi nu m, a to ɓei gawo tata n mwa m. Gama oza n ala gawo n mwa dole a gwo n waba gama owo tnu-tnu du lo.

49“Maɓe ntuge ma fin ena nu n anyi ye. Mi cei pma lo kwa ma zo nkoi 50Baptizma dagmai lo n ma bye. Mi cei pma lo kwa emi tnu-tnu kwa ku nu.

51“Fye gye ge maɓe ntu ge ma ga bugba fun nu n anyi ye? Awo, Amma maɓe n ajegnai nu. 52Puwa gmanyi ɓa kun kpe aje, aza ngun ata ɓei ye mi aza ngu aba toɓei ye mi m. Ko kwa aza ngun aba ɓei ye mi to aza ngun atai ye mi m.

53“Oda ɓei da gbo tu mi tukwo, oɓi wo da odo kwo kwa owo ya n wo mapwi ɓei da do. Oza to ɓei ye n wo yezhi yi m.”

54Nsayi Yesu wa gna aza vinya ge, “sanu fye gye anyi ɓai yezhi n nyipyeyi shin bwa, fya cige egma ɓelo. Deye zhin gaiciya nu.

55“Sanu fye gye ese kwoi ci n nyipyei kpe bwa, fya ci ge nyipyei ɓa wo n naiye. Deye kwo zhin gaiciya nu. 56Zagbelo! Fye kpe nya anyi da amma fye tagye wahala lo n kwo shi n fya bye nyi m. 57Kni nu zhin fyei to cei pma, fya gye nya kwo bmiya ma?

58“Ndai ha gye oza nzokwo woi lo n hoi n wada ba. Ɓawo gafara kafin fye si alkali aba. Ntuge nwo ta tnu hoi n jaru m.

59“Gama n kwa zhin ho lonu ho to ɓei shan po m. Dole sai hoi gba wo owo agyiwye vinya.”